Lok Sabha inthlan hmain PM Modi-a'n state zawng zawng tlawh dawn

Bharatiya Janata Party (BJP) chuan thuchhuah siamin, kumina Lok Sabha inthlan lo awm tur atana state tina an party worker-te chawh phur nan leh inthlan inpuahchahna atan, Prime Minister Narendra Modi chuan inthlan neih a nih hmain state zawng zawng a tlawh dawn niin an sawi.

PM Modi-a'n state tin a tlawhna tur ruahmanna hi siam tawh niin March thla laihawlah hian state a tlawh kim deuh vek hman tawh dawn niin BJP chuan an sawi. PM Modi hian Tamil Nadu a tlawh hmasa ber dawn a, chumi dawtah Lakshadweep leh Gujarat tlawhin, Maharashtra leh Bihar te'n an dawt leh dawn a, hei hi January 13 hmaa zawh hman tura ruahman a ni. PM Modi bakah hian Home Minister Amit Shah leh BJP national president, JP Nadda te pawhin PM hi an zui dawn a, Lok Sabha inthlan hun tur puan hmaa state zawng zawng tlawh hman an tum dawn a ni.

"State a tlawh hian mipuite nen function hman bakah road show buatsaih tum a ni a, state tin hi vawi khat ṭheuh a tlawh ang" tiin BJP chuan an tarlang. BJP hian party worker-te tihphur chu Lok Sabha inthlan lo awm tur atana an inbuatsaihna hmasa a ni a, hemi zawhah hian party-a hruaitu hlun tak takte'n Lok Sabha constituency ang zelin an tlawh kual ve leh dawn a ni. Heng party hruaitute hi BJP hian cluster-a an ṭhen Lok Sabha seat pali emaw panga zelah in-charge atan an dah a ni.