CCPA-in coaching centre-te inzawrhna dik tawk lo chungchang sawiho

Central Consumer Protection Authority (CCPA) chuan meeting hmasa ber neiin, coaching centre-te'n anmahni an inzawrh leh fak dan chungchanga thil dik tawk lo hrang hrang awm thei laka inven nan inkaihhruaina dan an buatsaih.

CCPA chairman, Department of consumer affairs secretary ni bawk, Rohit Kumar Singh chuan consumer-te thil dik lo laka ven chu CCPA ngaihpawimawh hmasak ber a nih thu sawiin,"Coaching centre-te inzawrh dan phungah hian fiah taka thil engkim tarlan a ni tur a ni. Consumer Protection Act, 2019 kalhin tu mahin thil dik tawk lo leh a lem hmangin an inzuar tur a ni lo a, hei hi consumer-te venhimna tur, CCPA-in kan endik hmasak ber tur a ni. Inkaihhruaina dan kan buatsaih hi coaching centre zawng zawngin an zawm tur a ni a, online a ni emaw, a hmuna class kal ngai a ni emaw, an inzawrhna ang chu an neiin an ti vek tur a ni," a ti.

Sorkar thuchhuaha tarlan a nih danin coaching centre-te inzawrh dan chungchanga inbumna tling chin tihchianna tur dan siam a ni a, hemi rual hian coaching centre-te chuan an neih loh leh theih loh hmanga inzawrh chu an ti tur a ni lo tih leh, an centre aṭanga tling tawh, hna hmu tawh chungchangah pawh thu dik lo an tarlang tur a ni lo tiin an sawi. "Coaching centre-te chuan an hnuai aṭanga hlawhtlinna changte chuan hlawhtlinna chan dan bakah an course kal te, an kal hun chhung te, an fee pek zatte an thlalak nen an tarlang tur a ni. Zaa za tling leh hna hmu ngei ngei tur emaw, prelims tling ngei ngei tur anga inzawrh chu an ti tur a ni lo. Dawrtute hriat tur an tarlan chu an inzawrhna chin ziah nana an font hman tiat chiah bawkin an ziak tur a ni a, chutiang ziahna chu hmun langsar leh hmuh theih ngeina hmun a ni bawk tur a ni," tiin, inkaihhruiana dan an siam thu leh, a zawm lote hremna dan tur pawh buatsaih a nih thu sorkar thuchhuahah chuan tarlan a ni bawk.