Covid-19 kai enkawl dam 73.18% tling tawh
India ramah hripui lengin ziaawm lam a pan hlei thei lo a, chutih rual chuan hri kai zinga a tam ber enkawl dam ni tawhin hri kai zinga 73.18% chu an dam tawh a ni.
Ministry of Health and Family Welfare-in nimina report an tihchhuahah chuan hri kai hmuh chhuah thar 55,079 an awm leh a, nimin piah lam aiin an tlahniam leh hret a ni. Hei nen hian hri kai hi mi 27,02,742 an awm tawh.
Darkar 24 chhungin hri kai enkawl dam 57,937 an awm leh a, hri kai hmuh chhuah thar aiin enkawl dam an tam leh zawk a, nimin thleng khan mi 19,77,779 chu an dam leh tawh a ni. Mi 876 lai an thih leh avangin hri vanga thi mi 51,797 an awm tawh a, hri kai mek 6,73,166 an la awm bawk. India ramah hian Covid-19 vanga thi hi hri kai tawh zawng zawng aṭanga 1.92% a ni.
Darkar 24 chhunga sample test record siam
Indian Council of Medical Research chuan nimina report an tihchhuahah darkar 24 chhungin Covid-19 sample 8,99,864 lai an endik a, nuai 9 an hnaih tawh hle. Hei hi darkar 24 chhunga sample test tam ber record a la ni. Hri len ṭan tirh aṭanga nimin thleng khan sample 3,09,41,264 an endik tawh.
'Test, Track and Treat' strategy kalpuina kawnga an tum ber pakhat, ni khata sample maktaduai endik theih an tum chu an hnaih hret hret zel a ni. ICMR hian ram chhung hmun hrang hrangah laboratory pawmpui 1476 an nei tawh a, chung zinga 971 chu sorkar laboratory niin 505 chu private laboratory a ni thung.
Maha-ah nuai 6 chuangin hri kai tawh
India ram State/UT zinga hriin a nghawng nat ber Maharsashtra-ah chuan hri kai hmuh chhuah thar 8,493 lai an awm leh avangin hri kai 6,04,358 an awm tawh a, mahse hri kai hmuh chhuah thar zat erawh an tlahniam ve deuh thung.
Maharashtra-ah hian hri kai enkawl dam 4,28,514 an awm tawh a, 20,265 thi tawhin mi 1,55,579-in hri an la kai mek. Tamil Nadu-ah chuan hri kai 3,43,945 an awm tawh a, 2,83,93 chu dam tawhin 5,886 an thi tawh a, 54,122-in an la kai a ni.
Andhra Pradesh-ah chuan hri kai 2,96,609 an awm tawh a, heng zinga 84,777 hian hri an la kai mek a, 2,09,100 chu dam leh tawhin 2,732 an thi tawh bawk. India ramah State/ UT zinga Lakshadweep-ah Covid-19 kai hmuh chhuah an la awm lo a, Lakshadweep leh Mizoramah thi an la awm lo bawk a ni.