Republic day parade kalpui danah ruahmanna thar siam

Union defence ministry chuan Republic Day parade kalpui a nih dan chungchangah state leh Union Territory (UT) te tan ruahmanna thar siamin, kum tina state zawng zawngte tan parade-a tela, an state ziarang phochhuah chu a remchan loh avangin, ruahmanna tharah chuan kum thum chhunga vawi khat tal parade-a an tel theih tur thu an puang.

Republic Day parade-a state leh UT-te inlan danah hian kum tinin lungawi lohna hriat tur a awm ṭhin a, state tam takin an lungawi loh thu sorkar laipuiah an thlen ṭhin a ni. Ruahmanna thar an siamah defence ministry chuan,"Kal dan phungah chuan Republic Day parade-ah hian state 15 inlan tura thlan an ni ṭhin a, hei vang hian kum tinin state zawng zawng an tel thei ṭhin lo. Ruahmanna tharah erawh kum thum chhungin vawi khat tal state zawng zawngte an inlan thei tawh ang," tiin an tarlang.

Hemi chungchangah hian defence secreary kaihhruaina hnuaiah state leh UT hrang hrang resident commissioner te nen meeting neiin vawi 3 aia tam sawiho a ni a, kum thum chhunga vawi khat tal parade-a an tel theihna tur hi rawt niin, Memorandum of Understanding (MoU) hi ziah a ni ta a ni. Hemi hnu hian inremna draft thawn chhuah leh niin state 28-in an sign tawh niin an tarlang bawk. "Ruahmanna thar hi kalpui nghal a nih theih nan state leh UT-te inhuam dan chin zawh an ni tawh a, Republic Day parade, 2024, 2025, leh 2026 atana ruahmanna thar anga kalpui an inhuam thu an sawi tawh bawk" an ti.

Kumin Republic Day parade-ah hian state 16 an inlan dawn a; Andhra Pradesh, Arunachal Pradesh, Chhattisgarh, Gujarat, Haryana, Jharkhand, Ladakh, Madhya Pradesh, Maharashtra, Manipur, Meghalaya, Odisha, Rajasthan, Tamil Nadu, Telangana leh Uttar Pradesh te chu parade-a tel tur state zinga mite niin, heng state thlan zinga tel ve lote chuan an duh chuan January 23 aṭanga January 31, 2024-a Red Fort-a Bharat Parv neih turah an inlan thei dawn a ni.