Ayodhya airport venhimna CISF kutah hlan

Prime Minister Narendra Modi-a'n December 30, 2023-a a hawn, Ayodhya airport venhimna hna chu Central Industrial Security Force (CISF) te kutah hlan a nih thu CISF-in an puang.

CISF-te kuta hlanna hun hi Nilaini khan hman a ni a, CISF Inspector-General, Vijay Prakash bakah, Airport Director, Vinod Kumar leh thlawhna service tur neitute aiawh hrang hrangte'n an telpui a ni. "CISF hian airport venhimna atan hian nileng zankhuaa hnathawk turin kan inpe a, airport himna tiṭhatu nih kan tum dawn a ni. Hmun thianghlim thlawh tura lo kalte tan an himna tur ṭha taka hnathawh bakah hun hriatrengtlak an neih theih nan venhimna kan kuta dah niin, he hmalakna hi kalpui a ni," tiin an thuchhuahah an tarlang. CISF kuta airport venhim hna thawhna tur hi January 22-a Ayodhya Ram temple hawn a nih hun atana inbuatsaihna pakhat nia ngaih a ni.

Ayodhya airport tiha hriat hi union cabinet meeting, January 5-a neih chuan Maharishi Valmiki International Airport hming a puttir a ni. Airport hi Faizabad, Uttar Pradesh-a awm niin, venhimna hna thawktu tur CISF hi Deputy Commandant officer-in a ho dawn a ni. Ayodhya aiport venhimna CISF kuta hlan a nih hian, CISF venhimna hnuaia airport awm zat chu 68 a tling ta a ni.