PM CARES Funds-a pawisa NDRF-a dah tura phutna chu SC-in hnawl

Supreme Court chuan nimin khan PM CARES Funds-a pawisa thawh khawmte chu National Disaster Relief Fund (NDRF)-a dah tura ngenna (petition) thehluh chu ngaihtuahin a hnawlsak.

SC chuan  NDRF-ah hian a hranpaa Covid-19 dona tur pawisa a ngaih loh thu leh PM CARES fund hi public charitable trust a nih thu a tarlang. He fund-a mi tlawmngaite pawisa thawh khawm chu thilthlawn pek tlingkhawm a nih thu SC chuan a sawi. Hei vang hian he fund-a pawisa thawh khawm hi NDRF-ah dah kher a ṭulna a awm lo niin SC chuan a tarlang.

National Disaster Management plan chu kum 2019-ah khan SC chuan siam a nih thu tarlangin, he plan hi Covid-19 dona kawnga thawk turin a tawk thu SC chuan a sawi. Chu vang chuan a hranpaa hmalakna thar (plan) siam emaw standard tih danglam ngai emaw a awm lo tiin SC chuan thuchhuah a siam.

Nimina SC-a judge pathum ṭhukhawm hi justice Ashok Bhushan chuan a kaihruai a, SC-a ngenna (petition) thehluttute hi NGO, Centre for Public Interest Litigation (CPIL) an ni. Hemi chungchangah hian June 17 khan SC chuan sorkar laipui hnenah petition thehluh a nih thu hi hriattirin, chhanna pe turin a lo hrilh tawh bawk. 

Hripui leng vangin kumin March 28 khan PM CARES Fund hi siam a ni a, he fund hi public charitable trust a nih bakah chhiat rupna lo thleng thei leh emergency thil atan fund-a pawisa thawhte hi hman theih a ni. He fund-ah hian prime minister chu ex-officio chairman a ni a, defence, home leh finance minister-te chu ex-officio trustee anni thung.