LS seat chuh tur insem chungchangah Trinamool leh Congress inrem thei lo

Lok Sabha inthlanpui lo awm tur atana BJP paihthla tura eptu party ṭangrual pawl, INDIA hnuaia party hrang hrangte chuan state tina Lok Sabha seat chuh tur insem dan tur an sawiho zel a, hetih lai hian West Bengal-ah chuan INDIA party, Congress leh Trinamool Congress (TMC) te chuan seat insem dan tur chungchangah inremna la nei thei lo.

West Bengal-a rorel lai Trinamool Congress chuan Lok Sabha inthlan lo awm tur atan hian Congress tan seat hnih chauh an kian thei niin an sawi a, seat insem chungchang sawihona, Congress din, National Alliance Committee-ah pawh an tel duh lo a ni. TMC hian seat an sem theih zat hi Congress pawh an hriattir tawh thu sawiin, chutiang thutlukna an siam chhan pawh an hrilh tawh niin an sawi. TMC MP pakhat chuan,"West Bengal-a Lok Sabha seat insem dan tur chungchanga kan thutlukna leh kan kal dan tur kan ruahman pawh kan hriattir tawh. Congress hruaitute hian thil nihna tak tak hi hmu fiahin, West Bengal-a an dinhmun hi hria se kan duh. Thu leng vak tam tak karah anni lakah hian rilru zau tak kan pu zawk a ni," a ti. MP hian West Bengal-a Congress nena seat insem chungchanga an phal tam tam theih dan chu Assam leh Meghalaya-a TMC tana seat an pek tam theih leh theih lohah a innghah ve thu sawiin, TMC chuan Meghalaya-ah hian LS seat pakhat leh Assam-ah hian seat pali chuh ve an duh thu a sawi bawk.

TMC hian seat insem dan phung chu 2019 inthlana party-te chet ṭhat danah leh West Bengal assembly inthlana TMC chet tawh danah innghat se an duh thu an sawi. TMC hian West Bengal Lok Sabha 39-a Congress vote hmuh zawng zawng chu 5% aia a tlem thu tarlangin, Congress erawh chuan seat hnih chauh chuh theih chu an tan a mualphothlak tiin an sawi ve thung a ni.