IHC-in Delhi-a Sunehri Masjid tihchhiat tur dodal

Indian History Congress (IHC) chuan New Delhi-a medieval hunlaia sak; Sunehri Masjid tihchhiat tur ruahmanna siam chu sut leh turin New Delhi Municipal Corporation (NDMC) an ngen. IHC hian conclave an neihah resolution siamin India chanchina sulhnu pawimawh tak nei leh a ruangam hmuh tur la awm, Sunehri Masjid tihchhiat a ni tur chu an dodal thu tarlangin, he mosque tihchhiat a nih lohna tur atan hian thuchhuah an siam bawk a ni.

NDMC hian Heritage Conservation Committee (HCC) hnenah an thlen angin, traffic dinhmun siam ṭhat nan Sunehri Masjid tihchhiatna tur thu hi an chhuah a, hetih lai hian IHC hian dodalin,"Sunehri Masjid hi Mughal hunlaia an thil siam, vawiin thlenga kan hman a ni. Unified Building Bylaws hnuaia Grade III buildings, clause 1.12, annexure II-a hrilh fiah a nih danin, hemiin a huam building te chu khawpui mawina atana pawimawh an ni a, tun hma architecture leh mihring nungho dinhmun an phochhuah bakah, tute emaw nunphung leh a chhehvel dinhmun a tarlang a ni. Tun hnaiah hian vawi tam tak medieval hunlaia thil siamte tihchhiat tumna hi a thleng tawh bawk a ni' tiin an tarlang.

IHC hian Sunehri Masjid pawimawhna chu Delhi khawpui din a nih dawna ruahmanna siamna atan pawh hman a nih thu leh, a awmna lai chu hnawk anga ngaia tihchhiat tumna chu New Delhi kawngpui siam ṭhatna tur atana ruahmanna mawl tak niin an sawi. "Eng dinhmuna ding leh eng building pawh ni se, kum 200 aia upa tawh a nih chuan, chu building chu Protection of Monuments Act hnuaiah tihchhiat phal a ni lo. Sakhaw kaihhnawih a nih chuan tihbawrhban phal a ni lo a, inkhawm nana hman a nih tawh loh chuan chhunzawm tawh loh bawk tur a ni," tiin, building tichhe lo zawnga dan zawm chu an ngaihpawimawh hmasak ber a ṭul thu an thuchhuahah hian an tarlang.