Surat leh Indore-in Swachh Survekshan Award 2023 dawng

Union urban affairs ministry bultuma India rama khawpui fai thlanna, Swachh Survekshan award 2023 chu Gujarat-a Surat khawpui leh Madhya Pradesh-a Indore khawpuite hnenah hlan niin, Surat leh Indore te hi khawpui fai bera thlan an ni. State anga lakin Maharashtra an ti ṭha ber a, Madhya Pradesh-in dawtin Chhattisgarh chu pathumna an ni.

India President, Droupadi Murmu chuan lawmman hlanna hun hi hmangin, khawpui fai thlan zinga tel, top 10 te hnenah lawmman hi a hlan bawk a ni. Surat leh Indore bakah hian khawpui fai 10 zinga thlante chu Navi Mumbai, Greater Visakhapatnam, Bhopal, Vijayawada, New Delhi, Tirupati, Greater Hyderabad leh Pune te an ni a, Indore bik hian a zawnin khawpui fai ber lawmman hi a ṭum sarih dawnna a ni tawh a ni. President Murmu hian he hunah hian Swachh Survekshan 2023 dashboard a tlangzarh nghal bawk.

Union urban affairs minister, Hardeep Singh Puri chuan India rama khawpui zawng zawng chu Open Defacation Free (ODF) a nih tawh thu tarlangin, hetiang dinhmun an thlen theih chhan chu sorkar laipui hmalaknaa Swachh Bharat Mission (India faina beihpuithlak) chu Jan Andolan (Mipui hmalakna) a chan tak vang a ni a ti.

Swachh Survekshan hian 2016 khan ṭan niin, a tirah chuan khawpui lian zual 73 chauh endik an ni a, tunah chuan khawpui 4,477 endik an ni tawh a ni. Kumina endik hna atan hian endiktu mi 3,000 chuang hman an ni bawk a ni. 2023-a faina survey neih thupui chu 'Waste to wealth' tih a ni a, 2024 thupui atan 'Reduce, Reuse and Recycle' tih chu hman a ni ang.