INDIA chiarperson atan Mallikarjun Kharge thlang

Indian National Developmental, Inclusive Alliance (INDIA) hruaitute chuan Inrinni khan virtual meeting neiin, INDIA chairperson atan Congress president ni lai, Mallikarjun Kharge an thlang.

INDIA chairperson thlan chungchangah hian Inrinni meeting-a INDIA-a tel party ṭhenkhat hruaitu tel hman lo, Trinamool Congress president leh West Bengal chief minister ni bawk, Mamata Banerjee bakah, Shiv Sena hotu, Uddhav Thackeray leh Samajwadi party chief, Akhilesh Yadav te rawnin thutlukna tawp hi la siam leh tur niin an sawi. Chiarperson atan Kharge hi lungrual taka thlan ni mah se, Jharkhand Chief Minister, Hemant Soren chuan Rahul Gandhi a rawt thung a, mahse, Gandhi hian Bharat Jodo Nyay Yatra a neih tur tarlangin, Kharge chu party president a nihna ang leh politics-a tawnhriat ngah tawh zawk a nih anga INDIA kaihruai tura a ṭhat zawk tur thu a sawi thung a ni.

Meeting-ah hian convener tur atan Bihar chief minister, Nitish Kumar hming a langsar hle a, mahse, Nitish Kumar hian convener nihna hi a pawm thu emaw, a phat thu a la sawi lo thung. Meeting neih zawhah hian official-a thu puanzar engmah a awm lo a, convener nih chungchanga Nitish Kumar-a thutlukna chu Janata Dal (United) general secretary, Sanjay Jha chuan an party chhunga sawihona an neih leh phawt hunah puanzar a nih tur thu a sawi.