SC-in motor-in a sut leh tlansan takte tana zângnadawmna tipung turin sorkar hriattir

Supreme Court chuan pawisa hlutna a tlakhniam zel avangin Motor Vehicles Act chu siam ṭha a, motor-in a sut, motor khalhtuin a tlanchhiatsan leh si avanga harsatna tawkte tana sorkar laipuiin zângnadawmna a pek chu tipung turin sorkar laipui a hriattir.

Dan hman lai mek, Motor Vehicles Act hnuaiah hian motor sut tuartu hi a thih chuan zângnadawmna, Rs. nuai 2 pek tur a ni a, hliam a tuar a nih chuan Rs. 50,000 pek tur a ni thung a ni. Supreme Court chuan,"Hetianga tawhsual tawk zinga tlemte chauh hian zângnadawmna an phut ṭhin a, tam tak chuan Motor Vehicles Act, section 161 hnuaiah zângnadawmna an dawng tur a ni tih pawh an hre lo" tiin, sorkar laipui chu kum tina zângnadawmna pek tur tihpun chungchang ngaihtuah tur leh, hemi chungchanga hriattirna hi vawiin aṭanga kar riat chhunga an tihfel an beisei thu an tarlang.

Kum 2022 chhung khan chhinchhiah chinah ram puma motor-in a sut, motor khalhtu tlanchhia ang hi 67,387 a awm a, heng zinga 205 chiah hian zângnadawmna phutin, mi 95 in an dawng tawh a ni. Hetiang tawhsual tawh chungchanga zângnadawmna phut theih dan chin pawh Supreme Court hian ruahmanna a siam thu sawiin, tawhsual tawktu chhungte hnena zângnadawmna an dil theih thu hrilh chu accident buaipuitu officer mawhphurna a nih thu leh, zângnadawmna dilna ngaihven zui chu district legal services authority mawhphurna a ni thung niin an tarlang.