INDIA zirlaite NEP sût phutin an nuar

Eptu party ṭangrual pawl, Indian National Developmental, Inclusive Alliance (INDIA)-a tel party hrang hrang zinga party 16 hnuaia zirlai pawlte chu New Delhi-a Jantar Mantar-ah pung khawmin, New Education Policy (NEP) sût tur leh hnam tlem zawk zirlaite tana Maulana Azad National Fellowship scholarship chu kalpui leh turin sorkar laipui an phut thu an tarlang.

Pung khawmte hmaah hian DMK hnuaia zirlai pawl hruaitu leh MLA ni bawk, C.V.M.P. Ezhilarasan chuan zirna chu democracy tana siam a nih thu leh, BJP chuan democracy chu tihchhiat an tum niin a sawi a, zirlai zawng zawng tana zirna sang zawk chhunzawm thei tura ruahmanna siam a ṭul laiin BJP chuan kawng harsa zawk an kalpui zel thu a sawi. Ezhilarasan hian PM Modi chu Hindutva rama India thlak tumah puhin,"Sakhua a zalenna ram kan nih angin mi zawng zawng awm theihna ram kan duh. Ram temple a hawn tur aṭang hian Modi hian India rama sakhaw zalenna hi tihchhiat a tum a ni. Ram temple hi kan dodal lo a, mahse, sorkar hian sakhaw zawng zawng intluktlanga a en theih kan duh," tiin a sawi. Prime Minister Jawaharlal Nehru-a'n President, Rajendra Prasad hnena temple hawng tura sawmna pawm lo tura a ngenna te a tarlang tel bawk a ni.

INDIA-a tel party hnuaia zirlai pawlte hian 'United Students of India' hming pua kal khawmin nawrh hi an huaihawt a, kum 2024 Lok Sabha inthlanpuiah pawh BJP chu hneh ngei an tum thu an sawi bawk. NEP leh scholarship bakah hian zirlai pung khawmte hian Common University Entrance Test (CUET) leh National Eligibility cum Entrance Test (NEET) te kalpui dan chu a dik tawk loh thu sawiin, zirlaite karah intluk lohna a siam bakah coaching kal theite tan kawng a hawn zau bik thu an sawi tel. Zirlai pung khawmte hian mi zawng zawng tana zirna leh eizawnna neihna tur, Bhagat Singh National Employment Guarantee Act siam an duh thu te, fee tihsan an dodal tur thu leh, kindergarten aṭanga graduate thlenga a thlawna zir theihna neihna tur te an phut thu an tarlang bawk.