Army Day vawi 76-na hmang

Ram tana an theihna sengtu leh nunna hlantu sipaite hriatrengna leh chawimawina atana hman ṭhin, Army Day chu nimin khan Uttar Pradesh khawpui, Lucknow-ah parade ropui tak neiin hman a ni. Army Day hi kum tin January 15-ah hman ṭhin a ni a, 1949 aṭang khan hman ṭan niin, hei hi India-in zalenna a hmuh hnua India mi, Field Marshal Kodandera M Cariappa-a'n Commander-in-chief nihna a chelh aṭanga hman ṭan a ni.

Army Day parade hi 2022 thleng khan Delhi cantonment-a Cariappa parade ground-ah neih ṭhin a ni a, kumin hi Delhi pawn lama Army Day hman a nih ṭum hnihna niin, nikum khan Bengaluru-a MED & Centre parade ground-ah hman a ni tawh bawk. Republic Day parade-a an tel leh ṭhin avangin Army Day parade hi chief of army staff chuan a endik ṭhin a ni.

Army Day pual hian Prime Minister Narendra Modi chuan Indian Army-te chu ram tana an inpekna leh an huaisenna avanga chhuanawm a tih thu sawiin,"India Army-te hian khawvel huap pawhin danglamna an nei a ni. Inrelbawlna ṭha ber leh thununna lekkawh ṭha ber an ni a, hun inher danglam dan a zirin anmahni pawh an insiam rem thei zel a, vawiinah hian kan sipaite tan hian ram pum leh kan hmanraw neih zawng zawngte hi kan ṭangrual a ni," tiin a sawi. PM Modi hian sipai nunna chan tawhte zahna chibai a buk thu sawiin, ram tana nunna hlantute chu ram pawhin an huaisenna avanga a zah thu a sawi bawk.

Army Day pual hian Chief of Army Staff, General Manoj Pande chuan sipaite chibai bukna thuchhuah a siam a, Supreme Commander of the Armed Forces, President Droupadi Murmu pawhin duhsakna thuchah a chhuah bawk. Kumin Army Day parade hi a ṭum khat nan Artificial Intelligence (AI)-in contingent tiṭha ber a thlang dawn a ni.