Covid-19 kai hmuh chhuah tam ber ni a thleng zel China aiin India-ah thihpui an tam tawh zawk

Health and Family Welfare Ministry report, nimina tihchhuah tharah chuan India rama coronavirus kai hmuh chhuah thar 7,466 an awm a, ram chhunga hri kai hmuh chhuah thar tam ber ni a thleng leh a ni.

India ramah hripui kai mi 1,65,799 an awm ta a, thihpui pawh an tam tawh hle a, China aiin thihpui an tam tawh zawk a ni. China-ah chuan mi 4,634-in an thihpui laiin India-ah chuan mi 4,706-in an thihpui tawh. China chu hripui vanga a buai tawh loh laiin India erawh a la buai hle.

Ram pumah hri kai enkawl dam tawh mi 71,106 an awm a, enkawl mek 89,987 an awm bawk a ni.

MOHFW report tihchhuahah hian enkawl dam leh rate hi 42.88% a ni a, report an tihchhuah hma darkar 24 chhungin enkawl dam 3,414 an awm. India hi hripuiin a nghawng nasat ram 10-na ni ṭhin kha report thar ber aṭang hi chuan pakuana a ni ta a, zual lam a la pan zel a ni.

Maharashtra chu an la sang fal reng a, mi 59,546 vei awm tawhin hmuh chhuah thar 2,598 an awm. Hri kai mek 38,984 awmin MOHFW report tihchhuah hma darkar 24 chhungin enkawl dam 698 an awm a, mi 18,616 chu dam tawha puan a ni. Hetihlai hian thihpui 1,982 awm tawhin Ningani bik khan hri vanga thi hi  85 an awm. 

Tamil Nadu-ah chuan hri kai hmuh chhuah thar 827 an awm a, mi 19,372 laiin an kai tawh a ni. Hri kai mek 8,679 awmin enkawl dam 10,548 an awm a, mi 145-in an thihpui tawh.

Delhi-ah chuan hri kai 16,281 awm tawhin kai hmuh chhuah thar an tam hle a, 1,024 an awm a ni. Thihpui 13 awm belh lehin mi 316-in an thihpui tawh a, enkawl dam 7,595 an awm bawk.

Gujarat-ah chuan 15,562-in an kai tawh a, Ningani khan mi 22-in thihpui lehin kai thar 367 an awm. Rajasthan-ah kai thar 364 awm lehin mi 8,067-in an kai a, a zatve aia tam enkawl dam tawh niin 4,817 an enkawl dam tawh a, thihpui 180 an awm a ni.

Maharsahtra tih lohah chuan Gujarat-ah hian thihpui an tam ber a, mi 960-in an thihpui tawh a, Madhya Pradesh chuan dawtin mi 321 an thi tawh bawk.