Home Ministry-in Centre for Policy Research FCRA registration titawp

Union home ministry chuan New Delhi-a awm, India rama public policy zir chianna changtlung leh ṭha ber pawla ngaih, Centre for Policy Research (CPR)-in ram pawn aṭanga ṭanpuina sum an dawn ṭhinna Foreign Contribution Regulation Act (FCRA) license a tihtawpsak.

Home ministry hian February 27, 2023 khan CPR-in FCRA registration an neih hi a lo suspend tawh a, dan bawhchhiatna awm anga hriat a nih avanga registration suspend hun chhung hi ni 180 a ni ṭhin. CPR registration bik suspend-na hi pawhsei zel niin, January 16, Thawhlehni khan registration tihtawp a nih thu hi an puang a ni. Home ministry thuchhuah chuan, CPR registration tihtawp a nih chhan hi sorkar hmalak mek laiah report an pe ṭhin a, hei hi FCRA dan bawhchhiatna a ni tiin an tarlang.

License tihtawpsak an nih chungchangah hian CPR president, Yamini Aiyar chuan ngaihtuahna thar nen kawng dang an zawn tur thu sawiin, sorkar aṭanga hriattirna hi January 10-ah an dawn tawh thu a tarlang bawk. "FCRA registration tihtawpsak kan ni hi a manganthlak a, kan thiamthu sawina hun mumal pawh kan nei lo a ni. Kum tam tak kan lo thawh tawh leh khawvel huap pawha India dinhmun leh mipuite tana policy ṭha zir chianna nei tura kan hmalaknate pawh a tawp a ni. Kan tumah erawh kan chiang a, beiseina sang tak nen dan dik taka kan buaina chunga rorelna dik hmuh theih beisei chungin kan hmalak dan tur kan ngaihtuah ang." tiin a sawi.

Kum 2022 khan IT department chuan CPR office hi an lo endik tawh a, IT department chuan CPR hian income tax return file lo hnenah pawisa an pek thu leh, CPR lehkhabu buatsaih chu sumdawnna atana zawrh chhuah a nih thu an sawi. Kum 2023 khan chhiah awltir an nihna an lo tihtawpsak tawh bawk a ni.