PM leh Amit Shah inkawm Vawiinah lockdown chungchanga thutlukna siam ang

Prime miniser Narendra Modi leh union home minister Amit Shah-te chu nimin khan inhmuin, Pathiannia tawp tur ram puma lockdown kalpui mek chungchang an sawi dun. Lockdown chhunzawm a nih dawn leh dawn loh chungchanga thutlukna chu vawiinah an siam rin a ni.

Nimina meeting-ah hian senior official-te pawh an tel a ni. Home minister hian hripui leng meka India dinhmunte leh, hma lak zel dan turte PM hi a sawipui nia tarlan a ni. Lockdown pawh hi kar hnih dang pawhsei leh a la nih a rinawm thu report ṭhenkhat chuan an tarlang bawk. Mahse pawhsei a nih pawhin hri leng hluarna hmun tih lohah chuan khuahkhirhna thlahdul a nih chhunzawm rin a ni bawk. 

PM Modi hian thla tina radio programme a  hman ṭhin, Maan Ki Baat chu Pathianni hian a nei leh dawn a, he hunah hian hri leng chungchanga India dinhmunte sawiin, lockdown kalpui zel dan tur pawh a puan rin a ni. 

Home Minister Amit Shah hian Ningani khan ram chhunga state chief minister-te chu video conference a lo neihpui tawh bawk a, lockdown kalpui zel dan turah an thurawn a la. 

Video conference-a tel, CM tam zawk chuan Covid-19 vanga lockdown hman mek chu pawhsei an duh tih home ministry official-te chuan an tarlang. 

Lockdown puan hnua PM-in state CM-te video conference a neihpui ṭhinah khan Amit Shah hi a tel ve ziah a, Ningania CM-te video conference neih hi Amit Shah-a'n ama puala a vawikhat neihpuina a ni. An inbiakna chanchin kimchang erawh home ministry official-te chuan an tarlang lo a ni.

PM Modi chuan March 24 khan ni 21 awh tur lockdown hmasa ber chu a puang a, hemi hnu hian May 3 thleng pawhsei leh a ni a, chumi hnuah May 17 thleng pawhsei leh a nih hnuah May 31 thleng pawhsei leh a ni.