Trade union-in loneitute nawrhna zawm dawn

Loneitu pawl lian ber Samyukta Kisan Morcha (SKM)-te'n February 16-a nawrh huaihawt an tum thu an puan hnuah nimin khan trade union hruaitute nen inkawmna neiin, joint press conference an nei chhunzawm a, press conference-ah hian Central Trade Unions (CTUs) chuan loneitute nawrh hi zawm an tum thu an sawi.

SKM leh CTU hruaitute chuan February 16-a ram pum huapa nawrh huaihawt an tum thu hi sawiin, kawngpui leh rel kawngte dan a ni dawn niin an sawi a, hei bakah hian central sorkar hnuaia office hrang hrangah an pung khawm dawn bawk a ni. SKM leh CTU te chuan nawrh an huaihawt tur hi Modi kaihhruai sorkar laipuiin policy a siam hrang hrangte duh lohna lantirna a nih tur thu an sawi. Political party hrang hrang 22-te chuan an thil phut leh ngiatte an thlawp thu leh, an thil phut chuan loneitute bakah, agriculture lama hnathawk te leh hna hniam thawk zawng zawngte nunphung chawikanna a hawi thu an tarlang.

Joint press conference neihnaah hian zirlai leh ṭhalai, hmeichhia leh khawtlang ṭhatna atana hnathawk ṭhinte bakah kawng danga thiamna nei hrang hrangte tel turin an sawm a,"Sorkar laipui hian rim taka thawkte leh ei ve ṭawk ṭawkte tana harsatna siam belh zawngin ruahmanna a siam a, hei hi loneitute nek chepna, mipui nek chekpna, hnathawktute nek chepna a ni vek a ni. Heng ruahmanna an siam zawng zawng hi danah chantirin, hmalakna ṭha angin an kalpui ṭhin a ni," tiin an sawi. AITUC general secretary, Amarjeet Kaur chuan central leh state sorkar chuan India mi, hnathawh nei lote hmang ṭangkaiin, indona awmna hmun, Israel-ah hnathawk tur a tir a, hei hi politics-a hamṭhatna hmanrua a ni a, heng hnathawka kalte himna hi an ngaihtuah lo a, National Skill Development Corporation leh sorkar laipui hian anmahni thiam chan nan engmah an sawi duh lo a ni, tiin a sawi bawk.