PM-in Ram temple puala postage stamp siam tlangzarh

Prime Minister Narendra Modi chuan nimin khan Ayodhya-a sak, Ram temple puala postage stamp siam a tlangzarh. Stamp-ah hian Ram temple lem bakah an thu chham (choupai) te, ni lem, Saryu river leh temple chhehvela milim siam hrang hrangte tarlan tel a ni.

Ram temple puala siam stamp hi chi ruk awmin, Ayodhya-a Ram temple lem chuanna te, Lord Ram-a thawnthua pawimawh tak tak - Lord Ganesh, Lord Hanuman, Jatayu, Kevatraj leh Ma Shabri lem chuanna te siam a ni bawk. Design hrang hrangah hian khawvela element panga; van, boruak, mei, lei leh tui, an vaia 'Panchabhutas' tia sawi chu lantir tum a ni a, hei hian khawvela thil awm zawng zawng inzawmna a entir a ni.

PM hian stamp tlangzarh rual hian ram hrang hrangin Lord Ram puala stamp an siam dah khawmna lehkhabu a tlangzarh nghal bawk. Lehkhabu hi phek 48-a chhah niin, khawvela mi chi hrang hrang tana Lord Ram pholanna tura buatsaih niin, stamp siamtu ram zingah hian US, New Zealand, Singapore, Canada, Cambodia leh UN te pawh an tel a ni.