Rajasthan-a Jat hnamte OBC-a telh phutin nuar

Rajasthan-a Bharatpur district-a Jaicholi-ah Jat hruaitute chuan central hnuaia Other Backward Classes (OBC)-a Jat hnam telh phutin an nuar. Jat hnam hruaitute hian January 22 ral hmaa an thil phutte tihhlawhtlin a nih loh chuan nasa zawka nawrh huaihawt kalpui an tum thu an sawi.

Jat hnam hruaitu, Mr Faujdar chuan kum 2015-ah Bharatpur leh Dholpur-a Jat hnam chu state dang pakua rualin reservation an neihna hlihsak an ni a, hei hi sorkar laipui hian dan leh inkaihhruaina felfai tawk loh vang tih chauhin an sawi a ni, a ti. OBC list-a telh an nih chuan central sorkar hnuaia hna leh zirna inahte an hnam tan reservation siam an nih theih tur thu sawiin,"January 22 thleng hi Gandhi-a duhdanin, tharum tel lo leh ralmuang takin kan nuar ang, mahse, kan thil phutte tihhlawhtlin a nih loh chuan nasa zawkin kan nuar chhunzawm ang," tiin, Jat Aarakshan Sangharsh Samiti convenor, Nem Singh Faujdar chuan a tarlang bawk.

Central hnuaia OBC list-a Jat hnam telh tura ngenna hi memoradum ziakin Prime Minister hnenah district collector kaltlangin, January 12-ah an thawn tawh thu leh, chhanna an la dawn loh thute an sawi bawk a ni.