Delhi police-in criminal law thar inzirtirna nei

Sorkar laipuiin criminal law thar hmang tura inbuatsaihna a kalpui mek chu Union Territory-ah hman hmasak turin ruahmanna siam a ni. Hemi bawhzui nan hian Delhi police chuan dan thar inzirtirna nei turin, hnuchhui lama thawktu mi 8,800 tan training buatsaih a nih tur thu a sawi. Delhi Police commissioner, Sanjay Arora chuan training-na hi Nilaini khan a hawng a ni.

Criminal law thar chungchang hriat fiah zual theih nan field officer leh police station-a duty, mi 8,800 te tan March 30 thleng training neih tura buatsaih a nih thu Delhi police hian an tarlang. Special Commissioner of Police (Training), Chhaya Sharma chuan Delhi police-ah hian mi 80,000 chuang an awm thu leh, thla ruk chhungin hnuchhui lama official-te zawng zawng training pek vek an tum tih a sawi. Training zawng zawngte hi ṭawng tluangtlam zawka dan sawi fiahna lehkhabu te pek vek an ni ang a, hemi hmang hian training tawp lamah written test neihtir an ni dawn a ni. Written hi an paltlang lo a nih chuan training ṭan ṭhattir leh an ni ang.

Chhaya Sharma hi criminal law thar hmanga police-te training pe tura thlan a ni a, official-te'n dan thar an hriat chian chu an thil tum ber a nih thu sawiin,"Dan tihdanglam tam tak zingah BNSS (Bharatiya Nagarik Suraksha Sanhita) hian pawikhawihna thlenna hmun a video-a lak leh audio record-te a phal tak avangin, video record dan phung te, geotag siam dan thlengin uluk taka kan inzirtir a ngai dawn a ni. Video record mai hi a tawk lo a, video-a an lak sawi fiahna an neihte a ṭul dawn a ni," tiin, entirna tam tak a awm theih thu leh, zir tur a tam thu a sawi.