LS seat insem dan turah UP-a SP leh Congress inrem thei lo

Eptu ṭangrual pawl, INDIA hnuaia thawk dun, Uttar Pradesh-a Akhilesh Yadav kaihhruai Samajwadi Party (SP) leh Congress party chuan an state-a Lok Sabha seat insem tur chungchangah inremna an la siam thei lo.

Party pahnihte hian ṭum thum inbiakna an neih hnuah pawh January 18 khan inremna siam thei loin inbiakna an titawp. SP hian Congress tan hian Lok Sabha seat hi 10 aia tam an kian thei lo niin an sawi a, hei hi Congress lam hian an pawm thei bik lo a ni.

Samajwadi Party secretary general, Ramgopal Yadav chuan Congress aiawh, National Alliance Comitttee te nen inbiakna an neih thu hi sawiin, Congress chuan seat 10 aia tam an duh a nih chuan party hotu lu berte'n an hruaitu, Akhilesh Yadav an biak a ṭul thu a sawi. Ramgopal Yadav hian inthlan awm tawha Congress chet dan enin Uttar Pradesh aṭang hian Lok Sabha seat pali chiah chuh an phu niin a sawi bawk. Uttar Pradesh hian Lok sabha seat 80 an nei a ni.

Inbiakna neih ṭan tirh hian Congress hian seat ngaihpawimawh zual an neih 15 an sawi a, heng seat hi inthlan awm tawhte thlir leta an party chet dan aṭanga chak an inbeiseina hmunte a ni. Hetih lai hian SP hian Congress chu seat li chauh chuh thei dinhmuna an din thu sawiin,"Congress hi Rae Bareilly-ah an chak a, Amethi, Fatehpur Sikri leh Kanpur-ah te pahnihna an ni bawk. Heng zawng zawng ngaihtuah hian Congress tan hian seat pali bak ken hi a harsa a ni," tiin an sawi. Congress leh SP-in seat insem chungchanga inbiakna an neihnaah hian Congress general secretary, UP in-charge, Avinash Pande leh state party president, Ajay Rai te chu an tel lo niin an sawi a, hei hi SP lama an aiawhte nen inhmuh thiam lohna an neih tawh vang niin an sawi bawk.