Ministry of education-in coaching centre-te inkaihhruaina tur siam

Ministry of education chuan coaching centre te inkaihhruaina tur siamin; kum 16 hnuai lam zirlai an la tur a ni lo tih te, mark ṭha leh rank ṭha nei tura intiamna te siam lo turin thuchhuahah a tarlang.

Private coaching centre hrang hrang a pun nasat avang leh, dan ang taka inkaihhruaina siam a nih loh avangin zirlai intihlum an tam te, zirna in kang te, coaching centre ṭhenkhata an zirtir dan phung dik tawk lo leh zirtirna hmanrua an neih ṭhat loh avanga harsatna hrang hrang sorkarin a dawn tam thu sawiin, Education Minsitry chuan hei vang hian inkaihhruaina siam hi an nih thu an sawi. "Coaching centre zawng zawngin graduate aia hniam thiamna nei zirtirtu atan an chhawr tur a ni lo a, zirlai neih theih nan an thuneihna piah lam, mark ṭha hmuh leh rank neih ang chite an tiam tur a ni lo. Kum 16 aia naupang zirlai an la tur a ni lo a, zirlai lak hun chhung hi secondary school exam zawhah an kalpui tawh tur a ni," tiin an tarlang.

Education Ministry-in coaching centre tana inkaihhruaina hrang hrang a siamte hi zawm a nih theih nan leh, endik a nih theih nan sorkar laipui chuan inkaihhruaina hman a nih aṭanga thla thum chhungin coaching centre awm sa leh din thar turte tan registration siam ni se, a ti bawk. Coaching centre-te kal dan leh endik chu state sorkar hna a ni dawn a, kawng hrang hranga coaching centre-te dinhmun a thlithlai ṭhin dawn a ni.