16th finance commission tan post 3 siam belh rawtna cabinet-in pawm

Prime Minister Narendra Modi kaihhruainaa January 18-a union cabinet ṭhu khawm chuan 16th finance commission atan officer level post pathum siam belh rawtna an pawm. Post siam belh turte hi joint secretary pahnih leh economic adviser pakhat niin, finance commission hnathawh puitu tur an ni dawn a ni.

Finance commission hi India constitution-a inziak leh constitution-in din tura a tih a ni a, post dang hi chu thuneihna pek a nih angin siam rem vek a ni tawh a ni. December 31, 2023 khan sorkar laipui hian 16th finance commission chairman atan Niti Aayog vice chairman hlui, Arvind Panagariya chu ruat a nih thu an chhuah tawh a, secretary atan Rtivik Ranhanam Pandey chu ruat a ni bawk. 16th finance commission hian October 31, 2025 ral hmain President hnenah report a theh lut tur a ni a, he report hi April 1, 2026 aṭanga kalpui ṭanin, kum nga chhung hman tur a ni ang.