Chhatisgarh CM hmasa ber Ajit Jogi a thi

Chhatisgarh chief minister hmasa ber Ajit Jogi chu nimin khan cardiac arrest vangin kum 74 mi niin a thi.

Ajit Jogi hi ni 21 liam ta khan Raipur-a Shri Narayana damdawi-inah dahluh a ni a, nikhaw hre loa ni eng emaw zat a awm hnuah nimin khan a thi ta a ni. Jogi enkawltu doctor chuan heart attack vawi hnih a nei tih sawiin darkar hnih vel zet a lung tinung leh tura hma an lak hnuah a thi ta a ni, a ti.

May 9 khan a tukṭhuan ei zo chu cardiac arrest a neih avangin damdawi-in panpui a ni a, ventilator hmanga enkawl zui a ni.

Jogi hi kum 2000 aṭanga 2003 inkar khan Chhat­tisgarh CM niin Congress party a ni ṭhin a, mahse kum 2016 khan Congress hi chhuahsanin Janata Congress Chhattis­garh (J) a din a ni. Jogi hian a nupui leh a fapa a thihsan.