Ram temple hawn niah sorkar laipui office-te khar a ni dawn

Sorkar laipui chuan January 22-a Ram temple hawnna hun hman a nih hunah sorkar laipui hnuaia office zawng zawngte chu chawhnu dar 2 leh a chanve thleng khar a nih tur thu an puang. Hei hi Ram temple hawnna hun serh an hman tur 'Ram lalla Pran Pratistha' sorkar hnathawkte'n an zawm ve theih nana ruahman a ni.

Department of Personnel and Training (DoPT) chuan thuchhuah hi siamin January 22, chawhnu dar 2 leh a chanve thlenga office khar tur hian sorkar hnuaia bank, thingtlang lama bank, financial institution hrang hrang leh public insurer te pawh a huam vek tur thu a tarlang. Hemi kaihhnawihah hian Finance Ministry chuan bank zawng zawngte hi hriattirna a pe tawh bawk a ni.

Uttar Pradesh, Ayodhya-a Ram temple hawnna hi Prime Minister Narendra Modi chuan a kaihruai dawn a, ni chanve chawlh puan a nih chungchangah hian sorkar laipui official chuan ni pum chawlh puang tur chuan gazette notification chhuah a ngaih avangin office memorandum kaltlanga tihtheih chin, ni chanve chawlh hi sorkar laipui chuan a puang a ni tiin a sawi.

Sorkar laipui hnuaia office-te tan hian kum khatah chawlh atana puan sa 12 a awm a; Republic Day, Independence Day, Mahatma Gandhi’s Birthday, Eid ul-Fitr, Eid ul-Zaha, Diwali, Dussehra, Guru Nanak’s birthday, leh Good Friday te niin, chawlha puan theih 14 a awm bawk a ni.