India leh Myanmar ramri hung thuai a ni ang : Amit Shah

Union home minister Amit Shah chuan Myanmar nena inremna an neih, Free Movement Regime (FMR) chu ngaihtuah ṭhat an tum thu sawiin, Naxal hel avanga India buaina pawh kum thum hnuah chuan a reh tawh tur thu a sawi.

Amit Shah hian Guwahati-a Assam Police commandos 2,551 te passing out parade-ah thu sawiin, India leh Myanmar chuan km 1,643 zeta thui ramri inṭawm an neih thu leh, FMR chu Act East policy hlawhtlin nana 2018 aṭanga kalpui ṭan an nih thu a sawi. Hei hian ram pahnih khua leh tuite chu visa tel loa ṭhenawm ram km 16 china thui thleng inkalpawh tawn theihna awlsam zawk a siam thu leh, inremna tihtawp a nih chuan mipuite chetvel theihna pawh a tawp tur thu a tarlang.

"Sorkar laipui hian FMR tihtawp duhna a nei a, hei hi ngaihtuah ṭhat tur niin, Myanmar nena kan inremsiamna hi a tawp thuai ang. Manipur chuan ramri hung hi an duh a, Myanmar mi zalen taka an lo lut hi an duh lo a ni. Mizoram leh Nagaland erawh chuan FMR tihtawp hi an dodal thung a, hei hi Myanmar lama awmte nena inlaichinna an neih vang a ni thung" tiin, ramri hung vat chu a pawimawh thu a sawi.

Home Minister hian Tezpur-a Sashastra Seema Bal foundation day vawi 60-na a hmanpuinaah thu sawi bawkin, India chu Naxal helpawl avanga an buaina aṭangin kum thum hnuah chuan an zalen tawh tur thu a sawi a, Congress chu Naxalism tinungtu leh Jammu & Kashmir-a helna tinungtu tiin a puh bawk.