Sorkar laipuiin World Vision registration a titawp

Union Ministry of Home Affairs (MHA) chuan World Vision India (WVI)-in Foreign Contribution Regulation Act (FCRA) hnuaia registration an neih chu tihtawpsak an nih thu an sawi.

MHA hian thuchhuah siamin, WVI chu ram dang emaw, anmahni hmunpui aṭang pawhin emaw ṭanpuina an dawn theih tawh loh thu sawiin, an registration tihtawp a nih thu an sawi a, hei hi FCRA hnuaia dan an bawhchhiat vang niin an tarlang. WVI hian 1986 aṭang khan FCRA hnuaiah registration neiin, ṭanpuina sum an dawnte hi khawtlang leh zirna in tana hmalak nan an hmang ṭhin a, sorkar department hrang hrangte nen inremna pawh an lo siam tawh ṭhin a ni. November 22 khan an registration hi suspend a lo ni tawh a, hemi hnu hian renew dil leh mah se MHA hian an registration suspend-na hi May 2024 thleng pawtsei lehin, FCRA dan zawm loh vang niin an sawi. Sorkar laipui hian 2011 aṭang khan pawl hrang hrang 20,000 chuang registration a lo titawp tawh a, January 10, 2024 khan Centre for Policy Research (CPR) registration pawh a lo titawp tawh bawk a ni.

Kum 2022 chhung khan WVI hian an thawhpui, US, Germany leh Switzerland aṭangtein ṭanpuina sum Rs. vbc. 170 vel an dawng niin tarlan a ni a, Federal Republic of Germany Consulate General aṭangin Rs. nuai 8 an dawng bawk. WVI hi naupangte puitu pawl niin, US-a innghat an ni a, khawvel puma Kristian pawl lian ber pawl niin, ram hrang hrang hmun 100-ah an inzar pharh a, India-ah hian kum 70 chuang an awm tawh. WVI hian November 2022 aṭanga an registration suspend a nih hnuah hmalakna an neih chhunzawm theih loh thu sawiin, FCRA hnuaia project office zawng zawngte an khar tawh thu leh, hnathawka an chhawrte pawh May 2023-ah an ban vek tawh thu an sawi.