Ram temple hawn ni atan state 3-in chawlh puang tawh

Sorkar laipuiin a hnuaia office hrang hrangte tan January 22-a Ram temple hawn a nih huna ni chanve chawlh a puan chu bawhzuiin, state pathum; Madhya Pradesh, Maharashtra leh Goa te chuan chawlh an puang.

Ram temple hawn nia serh leh sang buatsaih tur ‘Pran Pratishtha'-ah mipui tam thei ang ber an tel theih nan leh an lo zawm ve theih nan sorkar laipui hian ni chanve chawlh hi a puang a ni.

Uttar Pradesh sorkar chuan January 22-ah zirna in zawng zawng tan chawlh an puan thu sawiin, Haryana chief minister, Manohar Lal Khattar pawhin dry day an puan bakah sorkar laipui thuchhuah zulzui hian sorkar office, zirna in (college tiamin) leh corporate zawng zawngte tan chawhnu dar 2:30 thleng chawlh an puan thu an tarlang ve bawk. Delhi sorkar chuan January 22-a ni chanve chawlh hi an puang ve bawk a, Chhattisgarh, Rajasthan, Tripura, Assam, Gujarat leh Jammu & Kashmir te pawhin ni chanve chawlh hi an hman tur thu an puang ve bawk.

Hetih lai hian state pathum; Madhya Pradesh, Maharashtra leh Goa te chuan state pum chawlh an puan thu sawiin, Madhya Pradesh sorkar chuan sorkar leh private hnuaia university chin zawng zawngte chuan chawlh hi an puang a ni. Maharashtra sorkar pawhin state pum tan January 22 chu chawlh a nih tur thu an puang a, Goa chief minister, Pramod Sawant chuan an state-a Sakhali constituency-ah temple tihfai hna an thawh thu sawiin, Ram temple hawn ni chu state pum tan chawlh a nih tur thu a sawi ve bawk.