Kolkata Flyover siamtu company tualthah thubuai siamsak

Kolkata-a Ningania Vivekananda flyover chima thi chu mi 24 an tling tawh a, flyover siamtu IVRCL company lakah tualthah thubuai ziahluh a ni a, company official paruk chu man an ni tawh bawk.

Nimin tleng khan sipaite chuan flyover chimin a delhte zawn leh chhanchhuah hna an thawh chhunzawm a, an la chhuak kim tawh nia an hriat thu official-te chuan an sawi. Mahse lei chim chu thenfai fel a nih hma chuan an thawk chhunzawm zel dawn tih an sawi bawk.

Lei chim hnu hian chhan-chhuah hna thawk turin army rescue team tirh nghal an ni a, sipai 300 velin chhanchhuah hna hi an thawk a, an zingah hian medical team, surgeon, engineer leh gas cutter-te pawh tirh tel an ni bawk.

Vivekananda Flyover chim chhan hi hriatchian a la ni lo a, mahse police-te chuan a satu, IVRCL lakah thubuai an ziak lut tawh a, Kolkata-a an office pawh an kharsak nghal a ni.

Kolkata Police Commi-ssioner Rajeev Kumar chuan construction company official paruk chu man an ni tawh tih sawiin, a ṭul angin action an lak tur thu a sawi. Company official-te thu zawtfiah tur hian company hmunpui, Hyderabad aṭangin nimin khan member pali awmna police team chuan West Bengal hi an thleng tawh bawk.

West Bengal sorkar chuan Flyover chim chungchangah a mawhphurtute chu hrem ngei an nih tur thu a sawi. Vivekanand Flyover hi kilometer hnih-a sei niin, kum 2009 aṭang khan sak ṭan a ni. Company hnenah hian thla 18 chhunga zo fel tura hriattir ni mah se, a zawh hun tur hi vawi tam tak an bawhpelh a, kum sarih hnuah pawh hna hi 60% vel chauh zawh a la ni.

Hetihlai hian IVRCL chuan vawi tam tak lei siam zawh hun tihkhawtlai a nih chungchangah company chauh chu mawhphurtu a ni lo tih a sawi. Lei chim chu pawi a tih thu leh, thi chhungte an tuarpui thu a sawi rualin, he chhiatna thleng hi vanduaina liau liau a nih thu a sawi bawk.

Rorellai Trinamool Congress party chuan Flyover siamna tura contract petu, sorkar hmasa Left Front sorkar chu chhiatna thlengah mawhphurhna nasa tak neiah a puh. TMC MP Sudip Bandopadhyay chuan, "Fyover plan leh design-te chu Left sorkar laia siam a ni a, thil dik tawk lo a awm a ni. Tualchhung mite pawhin an sawisel fo a ni" a ti.