April 4-ah J&K CM la lut dawn

People's Democratic Party (PDP) president, Meh­booba Mufti-i chu April 4 hian Jammu and Kashmir Chief Minister atan lak luh a ni dawn tih an party thuchhuak chuan a tarlang. Mufti hi J&K-in hmeichhe CM a neih hmasak ber tur a ni.

State Governor NN Vohra hnenah pawh CM lakluh hun tura ruat hi hriattir a ni tawh niin PDP leader Amitabh Mattoo chuan a sawi.

Jammu and Kashmir Chief Minister hlui, Mufti Muhammad Sayeed a thih hnuah PDP leh BJP ṭangrual sorkar din chu hun rei tak ding chhunzawm thei loin an awm a, sorkar siam thei an awm loh avangin January 8 aṭang khan President's Rule hnuaiah dah a lo ni tawh a ni. Mahse PDP leh BJP hian inbiakna neiin,
ṭangrual sorkar chhunzawm leh hi an remti ta a ni.

Party pahnihte hian an sawidun hnuah sorkar thar lakluh hun tur pawh hi an rel fel nghal niin an sawi bawk.