Loneitute nawrh huaihawt vangin Police-ten Delhi - Jaipur Highway khar

Farm law thar pathum duh lohna lantirin nimin khan loneitu pawl hrang hrang chuan a ni 18-na atan nawrh an huaihawt chhunzawm zel. 

Lungawi lohna lantirna atan nimin khan Shahjanhanpur loneitute chuan Rajasthan-Haryana border-ah tractor hmangin Delhi panin kawng an zawh a, hei vang hian Delhi-Jaipur highway chu khar a ni. Hetih lai hian Chilla-a loneituten Delhi-Noida border an danna chu an tihtawp avangin highway pakhat erawh hawn a ni thung. 

Tractor hmanga loneitu eng emaw zatin Delhi an pan leh avangin police-te chuan Delhi khawpui chhung an luh lohna turin Delhi-Jaipur highway chu a lehlam lehlam aṭangin an dang a ni. 

Hetih lai hian loneitu pawl ṭhenkhat chuan farm law thar hi an thlawp thu sawiin, Inrinni liam ta khan union agriculture minister Narendra Singh Tomar an hmu. Minister hmutu, loneitu pawl hruaitu 29-te hian sorkar lain farm law a siam thar hi a sut leh a nih chuan lungawi lohna lantir an tum thu an sawi ve thung.

Prime minister Narendra Modi chuan a kaihhruai sorkarin farm law a siam thar hi chhanin, Inrinni khan sorkar hmalakna chu loneitute sum lakluh a pun theihna atan leh, an eizawnna a hlawk zawk theihna tur a ni, a ti. "Heng dante hian loneitute chu an thlai thar chhuah zawrh chhuah­na kawng thar a siamsak dawn a, investment pawh an hmuh phah dawn a ni. He dan siam thar hlawkpui tur ber chu loneitute an ni," a ti. 

Loneitu pawlte hian tukin zing dar 8 aṭanga tlai dar 5 thlengin farm law thar duh lohna lantirin Singhu border-ah chaw ngheiin nawrh an huaihawt dawn. 

Sanyukta Kisan Andolan hotu Kamal Press Singh Pannu chuan, zing dar 8 aṭangin loneitu pawl hrang hrang hruaitute chu chaw ngheiin nawrh hi an huaihawt dawn tih a sawi. Sorkar laipui chuan he dan siamṭhatna tur rawtnate siam mah se, an pawm thei lo a, heng dan pathumte hi sut vek turin an duh tih a sawi. An nawrh huaihawt mek chu sorkar chuan tihtawp sak tum mah se, boruak ṭha tak hnuaia lungawi lohna hi lantir chhunzawm zel an tum tih a sawi. 

Delhi-a rorellai, Aam Aadmi Party (AAP) chuan an party worker-te chuan loneitute thil phut an thlawpna lantirin vawiin hian chaw an nghei ve dawn tih a sawi. Delhi irrigation and flood control minister Gopal Rai chuan party headquarters-ah zing dar 10 aṭang tlai dar 5 thleng chaw ngheia nawrh hi an buatsaih ve dawn tih sawiin, he hunah hian party MLA leh councillor-ten an ho dawn tih a tarlang. 

Lakhminder Singh Jakhar, Deputy Inspector General (DIG), Prisons, Chandigarh chu Inrinni khan loneitute nawrh a thlawp avangin a bang.

Banna lehkha a thehluhah Lakh­minder Singh Jakhar chuan notice period-a a thla thum hlawh bakah arrear dangte chu hnutchhiah a duh thu a ziak bawk a, hei hi a rang thei ang bera a hna aṭanga a tal chhuah theihna tura a tih a ni.

"Loneitu ka ni hmasa a, police officer chu a hnuah ka ni leh chauh. Vawiina ka dinhmuna ka din theih chhan hi ka pain lo nei chunga lehkha mi zirtir vang a ni. Chumi a nih avang chuan ka engkim hi loneitute tan a ni," tiin a sawi.