Maha sorkarin hnathawkte Jeans leh T-Shirt hak khap
Maharashtra sorkar chuan sorkar office-a thawkte inthuam dan tur, dress code tichhuakin, office-ah jeans, t-shirt leh slipper an inbel a khap a, khar khata ni khat kuttah thuam, khadi inbel turin a ti.
General administration department chuan hemi chungchanga thuchhuah a siamah, sorkar hnathawk tam tak chu office-ah sorkar hnathawkte inthuamna tur ang ni lo tak, zahawm lo taka inthuam an awm fo niin a sawi. Hei vang hian mipuiah sorkar hnathawkte an hmuh dan dik tawk lo an awm phah fo tih a tarlang.
Sorkar thupekah hian sorkar hnathawkte chu kawr rawng lar lutuk leh maksak taka cheimawite ha lo tura tih an ni bawk. An hnathawhna hmun nena inmil lo taka an inthuam chuan an hna thlengin a nghawng thei a ni, a ti.
He thupek hi kuttah thuam chawi larna tura tih a nih thu tarlangin, sorkar hnathawkte chu Zirtawpni apiangah kuttah thuam inbel tura tih an ni. Office hun chhungin hnathawkte chuan office identity card a awrh reng tura tih a ni bawk. Dress code hi officer leh hnathawktu dang zawng zawngin an zawm vek tur a ni tiin a tarlang.
Maharashtra hma hian Bihar, Rajasthan, Tamil Nadu, Himachal Pradesh leh Karnataka sorkar chuan sorkar hnathawkte tan dress code hi an lo siam tawh bawk.