PM-in Ayodhya-ah Ram temple hawnna hun hmang

Hun rei tak sakhaw dang nena a hmun tur inchuha buaina an neih hnuah, Ayodhya-a Hindu-te'n Ram-a pianna hmun nia an sawi ṭhina Ram temple sak chu nimin khan prime minister Narendra Modi kaihhruaina hnuaiah hlan thianghlimna leh hawnna hun hman a ni.

Ram temple hawnnaah hian sawm bik mi 8,000 vel an tel a, Information and Broadcasting ministry chuan live-in an pe chhuak a, mahni awm hmun aṭanga temple hawnna hun lo entu hi India leh khawvel pumah mi nuai chuang an awm thu an tarlang. Rem temple hi vawiin aṭang hian mipui tana hman theih tura ruahman a ni.

Temple hlan thianghlimna, 'Pran Pratishtha' hi chhun dar 12:20 khan hman ṭan niin PM Modi hian Pran Pratishtha serh leh sang hi a khawih a, temple hlan thianghlimna hun hi a hmang a ni. Hemi hnu hian Ayodhya-a mipui kal khawmte hmaah thu a sawi leh bawk. PM hian temple chhunga Ram Lalla lim thar chu tlangzarhin, army helicopter chuan temple chungah hian van lam aṭangin pangpar ṭhahnem tak an lo thlak bawk.

Prime Minister chuan temple sak hna an zo har chu hrehawm a tih thu leh, tunah chuan hun rei tak hnuah, puan in maia Ram a chen a ngaih tawh loh tur thu te, ama temple thianghlim ngeia chengin an muangchan avanga a ngaihdam theih a beisei thu te a sawi. PM chuan hmun hrang hranga temple-ah he hun lawmna buatsaih a nih thu te, faina hun hman a nih thu te sawiin, ram pum chuan Diwali an hmang leh mek niin a sawi.

Ram temple hlan thianghlim ṭum khatna hi temple sak ṭan a nih, kum 2019 khan neih niin, hei hi hun rei tak chung temple sakna hmunhma thua Muslim leh Hindu te intihbuaina chungchanga Supreme Court-in thubuai chinfelna a tihchhuah kum a ni.

Tuna Ayodhya-a Ram temple thar saknaah hian 1992 thleng khan Babri mosque a ding ṭhin a, hei hi Hindu sakhaw zuitute chuan Ram-a pianna hmun nia sawiin Mosque lakah hian thubuai an theh lut a ni. An buaina hi Ram Janmabhoomi-Babri Masjid tia hun rei tak ngaihtuah a nih hnuah Hindu-te chu thiam chantirin, 2019 khan Chief Justice of India, Ranjan Gogoi kaihhruai Supreme Court bench chuan temple sak theihna tur hian thutlukna a lo siam ta a ni. Babri mosque hi kum zabi 16-na lai vela sak a ni a, 1992 khan kar sevak-te'n an tichhia a ni.

Ram temple hawnna hun serh atan rimawi chi 50

Hindu sakhaw vuantute chuan Ram temple sak thar hawn hun hi an nghakhlel hle a, hunpui pakhat anga ngaiin nimina temple hawnna hun hmanah hian India ram state hrang hrang aṭangin hnam hrang hrang rimawi 50 tihrik turin ruahmanna siam a ni. He hun serh hi "Mangal Dhwani" tih niin, Ayodhya-a thu leh hla thiam lar tak, Yatindra Mishra chuan rimawi tumte hi a kaihruai a ni.

Rimawi lak khawm zingah hian Uttar Pradesh aṭangin pakhawaj, phenglawng leh dholak te a tel a, Karnatak aṭangin veena, Punjab aṭangin Algoja, Maharashtra aṭangin sundari, Odisha aṭangin mardala, Madhya Pradesh aṭangin santoor, Manipur aṭangin pung, Assam aṭangin nagada leh kali bakah, Chhattisgarh aṭangin tambura te an tel bawk.

Ram Temple pualin laddu nuai 5

Madhya Pradesh-a Ujjain khawpuia Mahakaleshwar temple-ah Ram temple hawn ni pual atan hian laddu nuai 5 siam niin, nimin zing khan Ayodhya a thleng. Heng laddu-te hi Hindu sakhaw vuantu, Ram temple hawnna huna telte ei tur atana buatsaih a ni.

Laddu hi truck pangaah phurh an ni a, truck te hi sakawr chungchuanna atana buatsaih anga chei danglam niin, saffron-a chei leh Lord Ram thlalak tar a ni. Ujjain aṭanga Ayodhya inkar kawng hi km 1,000 tling lo deuh a ni a, kawng tluanin mipuite chuan 'Jai shri ram' ti chungin laddu phurtu truck hi malsawmna an hlan a ni. Laddu siam nan hian Mahakaleshwar temple enkawltute chuan temple-a thawk mi 150 bakah, pawl hrang hrang aṭangin mi tlawmngaiin an puih ṭhin thu an sawi.