'One Nation One Election' panel-in mipui ngaihdan 21,000 dawng tawh

India president hlui, Ram Nath Kovind kaihhruai, 'One Nation, One Election' committee chuan mipui ngaihdan hriat nana ngaihdan theh luh hun, January 5 aṭanga an hawn hnuah nimin thleng khan rawtna 21,000 chuang an dawn tawh thu an sawi.

Ngaihdan lut aṭanga a lan danin 81% te chuan a rual tlanga ram puma inthlan neih chu ṭha an ti niin an tarlang a, mipui ngaihdan bakah hian political party 46-te hnen aṭangin rawtna siamna hun an hawng bawk a, political party 17 chuan an rawtnate an theh luh tawh.

'One Nation One Election' panel hi nikum September khan din niin, kumin January 5 khan panel hian ram puma a rual tlanga Lok Sabha MP leh state assembly inthlan neih a nih theihna tur atana One Nation, One Election kalpui dan tur chungchangah mipui ngaihdan hriat nan ngaihdan leh rawtna siamna hun an hawng. Pathianni khan meeting neiin, meeting zawhah hian rawtna 20,972 an dawn thu leh, heng zinga 81% hian a ruala inthlan neih an duh niin an tarlang. Panel hi January 27-ah an ṭhu khawm leh dawn a ni.

Panel hian mipui leh political party-te hnen aṭanga rawtna leh ngaihdan a lak rual hian Election Commission rawtna pawh an ngaihtuah tel thu an sawi. Panel hruaitu, Ram Nath Kovind chuan chief justice hlui te, dan hre mi hmingthang tak tak leh election commissioner hlui bakah, Bar Council of India hruaitute, FICCI, ASSOCHAM leh CII te a rawn tel thu a sawi bawk. A ruala inthlan neih chungchangah hian Law Commission pawhin an ngaihdan an sawi tawh a, panel hian meeting leh hunah an sawm ve dawn niin an sawi.

'One Nation One Election' panel hi ram puma a ruala inthlan neih chungchang zir chiang a, ruahmanna siam tura din a ni a, a ruala inthlan neih tur hian Lok Sabha leh state assembly bakah municipal inthlan leh panchayat-te a huam dawn a ni.