Zirlaite intihbuai vangin NIT Srinagar khar

T20 World Cup neih meka semi-final West Indies-in India a hneh ṭuma National Institute of Technology (NIT) college, Srinagar-a Kashmir zirlaiten an lawm avangin state pawn lam zirlaite nen nasa takin an intibuai zui a, college hi khar a nih phah ta a ni.

Kar kalta Ningani zana West Indies an chak hnu khan, Kashmir zirlaite chuan an lo lawm a, Kashmir ni lo zirlaite an thinrim hle a, a tuk Zirtawpniah pawn lam mi zirlaite hian lungawi lohna lantirin Pakistan flag-te an hal zui a ni. Hei hi tualchhung mi zirlaite chuan an chhang let a, zirlaite inkara buaina a chhuah zui avanign police-te chuan hnawhdarh nan mittui tlakna hlote an hman a ngai hial a ni.

NIT Registrar Fayaz Ahmad Mir chuan buaina hi a punlun zel an hlauhthawn avangin college an khar nghal tih a sawi a, zirlaite pawh hostel aṭanga chhuak rih tura hriattir an nih thu a sawi. Vawiin aṭangin college hi hawn tum a nih thu a sawi bawk.

Union Home Minister Rajnath Singh chuan NIT, Srinagar-a buaina chhuak chungchangah J&K Governor leh DGP a biak nghal thu sawiin, zirlaite himna chu ngaih pawimawh a nih dawn tih a sawi. Minister chuan Deputy General of Police K. Rajendra hnenah college-ah hian police team tir nghal turin a hrilh bawk.