India rama rel chak ber tlantir dawn

India rama rel tlan chak ber tur, Gatimaan Express chu naktuk aṭang hian Delhi leh Agra inkarah tlan tir ṭan a ni dawn. Rel thar hi Union Railway Minister Suresh Prabhu-an Hazrat Nizamuddin station aṭangin a vailiam dawn a, he hunah hian minister of state Manoj Sinha leh MP dangte pawh an tel ang.

Gatimaan Express hi darkar khatah km 160-a chakin a tlan dawn a, Dehli leh Agra inkar, km 210-a thui hi minute 100 chhungin a thleng hman dawn a ni. Tuna India rama rel tlan chak ber ni mek chu Bhopal Shatabdi niin, darkar khatah km 150-a chakin a tlan a ni.

Rel thar hi ram≠chhung siam niin, pakhat siam nan hian cheng vaibelchhe 50 ruahman a ni a, pindan pakhat hi cheng vaibelchhe 3 man zel anga chhut a ni. Gatimaan Express-ah hian pindan 12 a awm a - executive class pahnih, chair car pariat leh pantry coach pahnih a awm dawn a, bio-toilet, LED lights leh microbuster dah a ni a, coach tinah hian hotspot device dah a ni bawk.

Gatimaan express chuan man tur hi chair car-ah Rs 750, executive class-ah Rs 1,500-a bithliah a ni a, catering leh hospitality operation chu Indian Railways Catering and Tourism Corporation (IRCTC) in a buaipui dawn a ni. South Indian leh continental food siam a ni ang a, coach tinah host leh hostess an awm ang.

Kar khat chhungin Taj Mahal khar ni, Zirtawpni tih lohah chuan tlan tir ziah a ni dawn a, zing dar 8:10 ah Hazrat Nizamuddin, Delhi aṭangin a chhuak ang a, dar 9.50-ah Agra a thleng ang. Agra aṭang hian tlai dar 5.50-ah tlan chhuak lehin, zan dar 7.30-ah New Delhi a tlheng dawn a ni.