Catholic puithiam chhuah thuai beisei

Yemen rama firfiakten Kerala mi, Catholic puiithiam an man chu chhuah zalen a nih thuai beisei a ni.

March 4 khan Yemen chhim lama Aden khuaa Mother Teresa din, Missionaries of Charity in tar an enkawlna hmun chu firfiakte hian beiin mi 16 an that a, Father Tom Uzhunnalil hi an man zui a ni. Firfiakten an thah zingah hian 'Nun' pali an tel.

Catholic Bishops' Conference of India (CBCI) aiawhte chuan Foreign Minister Sushma Swaraj an hmu a, minister hian sorkar chuan Father Tom chhuah a nih theih nan theihtawp a chhuah mek thu a lo hrilh. CBCI deputy secretary, Father Joseph Chinnaiyan chuan, "Minister Swaraj-i hian Father Tom chu a him thu leh, chhuah a nih theih nan inbiakna kalpui mek a nih thu te min lo hrilh a ni" a ti.

Media report ṭhenkhat chuan Good Friday ni khan IS firfiakte chuan Father Tom hi an that niin an sawi a, mahse Father Chinnaiyin chuan he report hi a dik loh thu a sawi.

Kerala Chief Minister Oommen Chandy pawhin Father Tom hi a him thu a sawi a, state sorkar chuan chhuah zalen a nih theih nan Union Minister Swaraj-i chu a ngen thu te a sawi bawk.