J&K CM atan Mehbooba Mufti-i la lut

Peoples Democratic Party (PDP) president Mehbooba Mufti-i chu nimin khan Jammu and Kashmir Chief Minister atan rinawmna thu tiam tira lak luh a ni. J&K CM 12-na leh hmeichhe CM hmasa ber a ni.

J&K Governor VV Nohra chuan Raj Bhawan-ah PDP-BJP ṭangrual sorkar thar hruaitu atan Mufti-i hi rinawmna thu tiam tirin a la lut a, a rual hian a minister 23-te pawh lakluh nghal an ni bawk.

Minister atana lakluh tharte hi PDP member 11 leh BJP member 11 an ni a, an ni bakah BJP hruaitu, Nirmal Singh chu Deputy Chief Minister atan lak luh a ni.

Nimin J&K sorkar thar lakluh inkhawmah hian PDP hruiatu hlun leh MLA Tariq Karra chu a tel duh lo. Karra hi Mufti-in a minister tur a thlan chungchangah a lungawi lo nia sawi a ni. Mufti hian a pa, CM hlui Mufti Mohammad Saeed hunlaia senior minister pathumte chu a ban a, an zingah hian portfolio pawimawh tak tak lo chang tawh ṭhin Altaf Bukhari pawh a tel.

CM thar lakluh inkhawm hi Union minister Jitendra Singh, Venkaiah Naidu, Harsimrat Kaur leh BJP hruaitu Ram Madhav-ten an telpui a, chief minister hlui pahnih Farroque Abdullah leh a fapa Omar Abdullah-te pawh an tel a ni. Mahse Congress party erawh chuan inkhawm hi an boycott a ni.

PDP-BJP ṭangrual sorkar hian member 87 awmna Assembly-ah thlawptu MLA 56 an nei. PDP hian member 27 neiin, BJP-in member 25 a nei a, People's Conference MLA pahnih bakah independent MLA pahnihin an thlawp bawk.

Mehbooba Mufti

Kum 56 mi niin, unau pali zinga a upa ber a ni a, fanu pahnih a nei.

University of Kashmir aṭangin Law degree a zo.

Kum 1996 khan Bijbehara (Anantnag) assembly bialah a ṭum khatna atan thlan tlin a ni. 2002 khan Wachi(Shopian) constituency ah thlan tlin a ni leh a, kum 2004 khan Lok Sabha inthlanpuiah south Kashmir-a Anantnag bial aṭangin thlan tlin a ni.

Kum 2014 Lok Sabah inthlanpuiah a bial ngaiah bawk thlan tlin nawn leh a ni.

Kum 20 politics a khel tawh a, inthlana a chuhnaah chak loh a la nei lo.