Central-in official-te an thil neih zat theh-lut turin hriattir

Central sorkar hnuaia thawkte chu Lokpal Act in a phut angin kum hnih kalta chhunga an thil neih zat leh leiba an neih zatte tarlanna kimchang April 15 hma ngeia thehlut tura hriattir an ni. An thil neih bakah an nupui/pasal leh an fate hming thil neihte pawh thehlut tura hrilh an ni bawk.

Hnathawkte hian foreign bank account-a sum an neih zat kimchang te, lemziak man to chi te, hmanlai thil hlu, furniture, electronic equipment, insurance, share leh mutual fund bakah an thil neih hlu dangte kimchang taka an ziahlan a ngai dawn a ni.

Department of personnel and training (DoPT) chuan tunhnaiah central sorkar hnuaia ministry zawng zawnga secretary-te hnenah lehkha thawnin, an hnuaia thawk zawng zawngte chuan an thil neih zat thehluh tir vek turin a hriattir.