Congress leh DMK-in seat insem dan tifel

Tamil Nadu state assemby inthlan neih tura thawkdun tur, Congress party leh DMK chuan seat insem dan tur an rel fel ta.

Congress hruaitu Ghulam Nabi Azad chuan nimin khan Chennai-ah DMK president M Karunadhi chu a chenna inah a kawm a, May 16-a inthlan neih tura party pahnihte seat insem dan tur hi an sawidun a ni.

Meeting zawhah chanchinbu mite a kawmnaah, Azad chuan Congress party chuan seat 41-ah a chuh dawn tih sawiin, Karunanidhi-a kaihhruaina hnuaiah an chak ngei a rin thu a sawi.

Party pahnihte hi kum 2004 Lok Sabha inthlanpui neih dawn khan an lo thawkdun tawh a, mahse Sri Lanka-a Tamil mite chungchanga sorkar laipui hmalakna duh loin, kum 2013 khan DMK hian Congress kaihhruai UPA a chhuahsan.

Kumin February 13 khan Azad-a hoin Congress palaite chuan DMK hotu hi a chenna inah an hmu a, assembly inthlan neih tura party pahnihte thawhdun dan tur chungchang an rel a ni. Thawhdun an remtih hnuah, seat insem chung≠changah hun eng emaw chen an inrem thei lo a ni.

Congress party hian kum 2011-a an thawhdun ṭuma a seat chan zat, assembly seat 234 aṭangin seat 63 chan leh a duh a, mahse DMK hian seat 30 aia tam pek a duh lo thung. Hun eng emaw chen inbiakna an neih hnuah, Congress tana seat 41 dah hi Karunanidhi chuan a remti ta, hei hi Congress pawmin a pawm thei ta a ni.

Tamil Nadu-a rorellai, AIADMK pawhin a seat chuh zat tur a tifel tawh. AIADMK hian seat 227 a chuh dawn a, a thawhpui party dangte tan seat 7 chauh a dahsak. Chief Minister J Jayalalithaa-i chuan Chennai-a RK Nagar bialah a ding dawn tih a sawichiang nghal bawk.

Tamil Nadu assembly inthlan hi May 16-ah neih a ni dawn a, May 19-ah assembly inthlan neihna state dang - Assam, Bengal, Kerala leh Puducherry rualin result puan a ni ang.