PM Modi-a'n solar roof top scheme tlangzarh

Prime minister Narendra Modi chuan Thawhṭanni khan Ram temple hawnna a neih zawh hnuah, solar roof top scheme tlangzarhin, India rama in vaibelchhe khat tan solar roof top pek a nih tur thu a sawi. Solar roof top hmang hian in chungah solar panel dah a ni dawn a, hei hian ni zung chakna hmanga eng intodelhna kawng a hawng dawn a ni.

"Vawiina Ayodhya-a hun pawimawh tak kan hman lai hian India mipuite tana ka thil tumte chu tihnghehin a awm a ni. India mi zawng zawngte hian mahni in chung atan solar roof an neih vek hi ka duh a, Ayodhya aṭanga ka let hnua thutlukna ka siam hmasak ber chu he sorkar hian solar roof top scheme - ‘Pradhan Mantri Suryodaya Yojana’ tlangzarh hi a ni. He scheme hmang hian mi vaibelchhe khat in chung atan solar panel pek a ni ang a, hei hian mi retheite tana eng chhit man a tihhniam dawn bakah India chu enga intodelh ramah min siam dawn a ni," tiin X-ah a tarlang.

Tun dinhmunah India ramah hian solar roof top nei zat hi sorkar laipui hian chhinchhiahna mumal tak a nei lo a, solar install zat hrim hrim chu pung mah se, solar roof top awm zat tak erawh hriat a ni lo. July 31, 2023 thlenga tarlan a nih danin, India ram pumah solar rooftop hi 2.2 gigawatt hu vel install tawh a ni.