Stock market hlutnaah India-in Hong Kong a lehpel

Indian stock market chu khawvela stock market lian ber palina ni turin nimin khan Hong Kong a lehpel niin Bloomberg chuan an tarlang. Bloomberg report tarlan danin Indian stock market-a share zawng zawng hlutna belh khawm hi USD 4.33 trillion-ah a pung chho a, hetih lai hian Hong Kong stock market hi USD 4.29 trillion a ni thung. Khawvela stock market hlu zual ramte chu a indawt danin US, China leh Japan te an ni.

India stock market hlutna hian a ṭum khatna turin nikum December 5 khan USD trillion 4 hi a kai a, heta ṭanga a chanve vel hi chu kum li ral ta chhunga pung chho a ni. Thla 12 ral ta chhung kha Indian stock-a pawisa invest-tu hlawk lai ber a ni a, 2023 chhung khan sensex leh nifty te chuan 17%-18% dawnin hlawkna an tel belh. Sensex leh Nifty-te hian 2022 khan 3%-4% vel chiah hlawkna an tel thung.

Stock market hlutna pun chak chhoh chhanah hian agency tam tak chuan GDP punna tur ṭha avang te, thil man sang tur thunun theih tawk ni si te, central-a sorkar nghet leh central bank-in khawvel puma monetary policy ṭha tak an neih vangte niin an sawi. Hei bakah hian Foreign Portfolio Investors (FPI) aṭanga India-a sum lo lut ṭha tak te chu stock market ṭhan chhan a ni bawk.