Congress-in AP assembly inthlanah party malin chuh dawn

Andhra Pradesh-a All India Congress Committee (AICC) in-charge, Manickam Tagore chuan Pathianni khan state assembly inthlan lo awm tur atan Congress chuan Andhra Pradesh-a seat awm zawng zawng; 175 chu party mala an chuh tur thu a sawi.

Andhra Ratna Bhavan-a press conference a neihah YS Sharmila chuan All India Congress Committee (AICC) in-charge for Andhra Pradesh, Manickam Tagore hnenah January 24 aṭangin Congress hminga in-candidate duh tan dilna theh luh theih a nih thu a sawi. Inthlan neih tura inbuatsaihna atan YS Sharmila hian January 23 aṭangin distirct tina party hruaitu leh thawktu zawng zawng meeting a neihpui dawn a ni. Sharmila hian ni khatah district pathum zela hruaitute meeting neihpui a nih tur thu sawiin, January 31-a zawh turin ruahmanna siam a ni, a ti.

YS Sharmila hi Andhra Pradesh chief minister ni lai leh YSR Congress party president ni bawk, YS Jagan Mohan Reddy farnu a ni a, Andhra Pradesh Congress Committee (APCC) president atan Pathianni khan lak luh a ni. Sharmila hian Congress a zawm chhan chu a pa, boral tawh leh Andhra Pradesh chief minister pawh lo ni tawh, Y. S. Rajasekhara Reddy-a'n Congress a ṭan ṭhin vang niin a sawi.