Bihar-ah zu khap burna dan hmang

Bihar state chuan ruahman lawk aia thla ruka hmain zu khap burna dan a hmang ṭan ta.

Kar kalta Zirtawpni khan state sorkar chuan a thawh khatna atan tualchhung siam zu zawrh leh hralhchhuah khapna dan a hmang a, rampawn lam siam zu erawh khap tel a ni rih lo. Zu hi a tahtawla khap chhoh tura ruahman lawk ni mah se, Chief Minister Nitish Kumar chuan zu khapna dan an puan chu mipui lamin an dawnsawn ṭhat avangin zu eng chi pawh khap burna dan hi hman nghal turin cabinet meeting chuan a rel ta a ni, a ti.

Nimin aṭang khan Bihar state chhung khawi hmunah pawh zu in leh zawrh khap bur a ni a, hei hian bar leh restaurant-te pawh a huam tel nghal vek a ni.

Nitish Kumar chuan, " Tualchhung siam zu khapna dan ni li kan hman chhung khan vantlang mipuiten an thlawp ṭha nghal hle. Khawpui liana sorkar enkawl zu dawra zu hralhchhuah, thla ruk hnua khap tura kan ruahmante chu mipuiten nasa takin an dodal a, hei vang hian khap burna dan hman hun tak niin kan hre ta a ni" a ti.

Bihar state hian nikum chhung khan zu chhiah aṭangin cheng vaibelchhe 3,300 a la lut a, zu khap a nih tak avangin sorkarin a sum lakluh tur tam tak a chan phah dawn a, mahse hei hi CM chuan pawi a tih loh thu leh, zu chhiah chu a it loh thu a sawi.

Zu khapna dan pass a nih hian Bihar-a MLA 243-te chuan zu laka inthliarfihlim turin thu an tiam nghal a ni. Thawhṭanni khan state police sang tel chuan zu in lo tur leh, zu khapna dan chu hlawhtling taka kenkawh a nih theih nana theihtawp chhuah an intiam bawk.