Karpoori Thakur hnenah Bharat Ratna hlan dawn

India president, Droupadi Murmu chuan India rama civil chawimawina sang ber, Bharat Ratna chu Bihar chief minister ṭum hnih lo ni tawh leh socialist hruaitu hmingthang tak, Karpoori Thakur hnenah hlan a nih tur thu a sawi.

Prime minister Narendra Modi chuan Karpoori Thakur hnena Bharat Ratna hlan tur chu hnam hnuaihnung zawkte tana a hnathawh ropui tak entirna leh, khawtlanga rorelna dik leh intluktlanna awm theih nana a beihna chawimawina a ni, tiin X-ah a tarlang.

Bihar chief minister Nitish Kumar chuan Bharat Ratna hlan tura Karpoori Thakur thlan a ni chu lawmawm a tih thu leh, thlan a nih theih nana rawtna siamtu, PM Modi chu fakawm a tih thu a sawi. Nitish Kumar chuan Thakur hnena Bharat Ratna hlan chu JD(U)-in hun rei tak an lo beisei leh phut tawh thil a nih thu a sawi bawk. Bihar BJP hruaitu, Bhim Singh pawhin Thakur hnena Bharat Ratna chawimawina pek tur chu Bihar chawimawina a nih tel thu a sawi.

Karpoori Thakur hi Bihar chief minister ṭum hnih ni tawhin, Bharatiya Kranti Dal aṭangin December 1970 leh June 1971 inkar leh Janata Party aṭangin, December 1977 leh April 1979 inkarah khan chief minister a lo ni tawh a ni. British awpna aṭanga zalenna sualna kawngah mi pawimawh tak a ni a, quit India movement 1942-ah khan man a lo tawk bawk a ni. Khawtlanga mipuite intluktlanna atana a hmalakna avangin India politics hmelhmang thlaktu tiin an sawi ṭhin. Kum 1977-a chief minister a nih laiin Mungeri Lal commission chuan backward class te chu (Muslim-te tiamin) extremely backward classes tia thliar an ngaih thu report an theh lut a, hei hi Thakur hian bawhzui nghalin, 1978-ah kalpui nghal a ni. Hemi hmalakna avang hian Bihar sorkar hnuaia sorkar hna lak turah hnam hnuaihnung zawkte tan reservation 26% siam a ni ta ni. He hmalakna hi Mandal commission report anga 1990-a Other Backward Classes (OBC) tana 27% reservation siam hma hruaitu nia ngaih a ni bawk.

Karpoori Thakur hi 1988 khan a boral a, Congress party mi ni lo, socialist hruaitu zinga India rama chief minister vawi hnih ni thei hmasa ber a ni. 'Jan Nayak' tia koh ṭhin a ni bawk a, Bharat Ratna dawngtu 49-na a ni dawn a ni.