Congress-in state level workers convention nei dawn

Congress party chuan 2024 Lok Sabha inthlanpui lo awm tura an party inbuatsaihna pakhat atan vawin aṭangin state level workers convention an nei dawn. Party president Mallikarjun Kharge chuan meeting hi a kaihruai ṭhin ang.

State level workers convention hmasa ber hi vawiin hian Congess party-in sorkar thar an siamna, Telangana-ah neih a ni dawn a, January 28 hian Uttarakhand-ah neih chhunzawm a ni leh ang. State dangah kal zelin, Odisha-ah January 29-ah convention hi neih tum a ni a, February 3-ah Delhi-ah, February 4-ah Kerala leh February 10-ah Himachal Pradesh-ah neih tura ruahman a ni. February 11-ah Punjab-ah kal lehin, February 13-ah Tamil Nadu leh February 15-ah Jharkhand-ah neih a ni leh bawk ang tiin Congress general secretary, KC. Venugopal chuan a sawi.

Venugopal hian party president Mallikarjun Kharge chuan convention neih a nih apiangin booth, state leh a bak thlengin office bearers te meeting a neihpui ṭhin tur thu a sawi bawk.

Kharge chuan chhun leh zana hna an thawh ṭhin thu sawiin, 2024 Lok Sabha inthlanah chuan mipuite'n BJP sorkar thlakna tura duhthlan tur an neih ngei theih nan an thawk niin a sawi. "Kan danglamnate dah ṭhain, thil tenau lutuka midang beih leh keimahni zinga inbeihnate awm lo se, hei hian Congress-in hnehna kan channa tur kawng a dal thei a ni," a ti.

Congress party hian inthlanpui lo awm tur atana inbuatsaihna kawng dang, Rahul Gandhi kaihhruaiin Bharat Jodo Nyay Yatra a kalpui mek bawk.