TMC-in party mala Lok Sabha inthlan an chuh tur thu puang

West Bengal-a rorel lai, Mamata Banerjee kaihhruai, Trinamool Congress (TMC) chuan 2024 Lok Sabha inthlanpui lo awm tur chu party mala chuh an tum thu an puang.

Trinamool Congress hi eptu party ṭangrual pawl, INDIA-ah tel mah se, West Bengal-a Lok Sabha seat awm zawng zawng; seat 42 chu party dang nena seat insem lo a, party mala chuh an tum a ni.

TMC hruaitu, Bengal chief minister Mamata Banerjee chuan party mala Lok Sabha an chuh tur thu hi sawiin, Congress nena seat insem chungchangah mimala inbiakna an neih loh thu a sawi. "Vawi tam tak seat insem dan turah rawtna siamin ka hrilh tawh a, an hnawl zel a ni. Ram pum angin eng nge thleng ang ka ngaihven lo a, mi zawng zawng huapzo party kan ni a, Bengal-ah chuan keimahni chauh pawhin BJP chu kan hneh ang', a ti. "Congress hian an duh chuan anmahniin Lok Sabha seat 300 pawh an chuh thei, keimah ngei pawhin ka pui anga, chung seat-te chu ka chuh lo bawk ang, mahse, regional party-te an chak zawkna hmun a awm a, heng hmunah hi chuan regional party-te seat kian thiam rawh se," tiin a sawi bawk.

Mamata hian Congress chu bei chhunzawmin, Rahul Gandhi kaihhruai, Bharat Jodo Nyay Yatra chu an state-a a luh dawn thu leh INDIA-a thawkho vek ni chung sia engmah hriattir a ni lo chu a lungawithlak loh niin a sawi a, INDIA chu India ram pumah an awm anga, Bengal-ah erawh chuan Trinamool-in BJP an bei dawn a ni, a ti.

2024 Lok Sabha inthlan lo awm tur atana eptu party ṭangrual pawl indin, INDIA-ah hian Congress leh Trinamool te hi thawkho vek ni mah se, West Bengal-a Lok Sabha seat chuh tur insem dan tur chungchangah hian inremna an nei thei lo a, inbiakna ṭum eng emaw zat an neih tawh pawh an lo titawp tawh a ni. Mamata chuan Congress chu seat pahnih an ken theih thu leh Congress chuan seat 10 aṭanga 12 an phut thu sawiin, hei hi Bengal-a inthlan awm hnuhnung pahnih thlirin thil awm ang lo tak niin a sawi a ni.