Transport union pariatin CTU leh SKM nawrh an zawm dawn

Central Trade Union (CTU) leh Samyukt Kisan Morcha (SKM) te'n sorkar laipuiin criminal law thar hman tura a duan zingah, Bharatiya Nyaya Sanhita (BNS) hnuaia lirthei khalhtute hremna na tak pekna tur siam duh loa February 16-a ram pum huap nawrh huaihawt an tum chu transport union dang pariatin zawm an tum thu an puang.

Transport union-te hian January thla tir khan he dan an duh lohna lantir hian hnathawh an lo chawlhsan lailawk tawh a, sorkar laipuiin union aiawhte nena inbiakna an neih hnuah chauh dan chu hman ṭan tur a nih thu an sawi hnuah an tawpsan a ni. Hetih lai hian CTU leh SKM te hian a rang lama dan thar chu sorkarin a siam ṭhat emaw, a hnuhdawh emaw phutin February 16 hian nawrh huaihawt an tum ve leh thung a, hei hi transport union -te hian sorkar nawr nan an zawm dawn niin an sawi. "Road transport sector kaihhnawiha hnathawk, pawl awm zawng zawngte chu he nawrh zawm ve tur hian kan sawm che u a ni. Sorkar laipui hian he dan hi hnukdawk ngei se kan duh' tiin an thuchhuahah an tarlang.

CTU leh SKM hian thuchhuah inṭawm siamin,"Modi sorkar hnuaia mimal sumdawng hausa chak tak leh khawtlanga inthliarna awm te, thuneitu tlemtein ro an relna te hian mipui zawng zawng kan inpumkhatna tur leh India constitution-a democracy, federalism, secularism leh socialism te a dal vek a ni," tiin, inlungrual taka nawrh an huaihawtna tur chu ram chhunga sakhaw zuitu ṭhenkhat pawng lutuk tur veng a, ni tina ei chawp zawng ṭhinte dinhmun ngaihven tura vawrh chhuahna hmanrua a nih thu an sawi.

Sorkar laipuiin misual hremna dan thar an pass tak, Indian Penal Code thlakna; Bharatiya Nyaya Sanhita (BNS) hnuaia section 106(1) leh (2)-ahte hian lirthei khalhtuin a inthlahdah leh tlan chak avanga mi a sut a, lirthei khalhtu chu a tlanchhia a nih chuan kum 5 aṭanga kum 10 thleng lung in tang tura hrem theih a nih bakah Rs. nuai 7 thleng chawitir theih a ni dawn a ni.