President-in gallantry award pek tur mi 277 a pawmpui

President Droupadi Murmu chuan force lama thawkte chawimawina sang, gallantry award pek tura rawt, mi 277 te chu a pawm tawh thu sorkar laipui chuan tarlangin, award hi vawiina New Delhi-a Republic Day lawmnaah hlan an ni ang.

Gallantry award hlan tur 277 zinga 275 hi Jammu & Kashmir police hnenah 72, Maharashtra aṭangin mi 18, Chhattisgarh aṭangin mi 26, Jharkhand aṭangin mi 23, Odisha aṭangin mi 15, Delhi aṭangin mi 8, Central Reserve Police Force (CRPF) mi 65, Sashastra Seema Bal (SSB) mi 21, CAPF mi tlem bakah State leh UT ṭhenkhata police-te an ni ang. Award pahnih dang hi Police Medal for Gallantry (PMG) niin, he award hi Border Security Force (BSF) mi leh sa pahnih, Butembo camp-a United Nations Organization Stabilization Mission in the Democratic Republic of Congo (MONUSCO)-a tel a, remna awm theih nana an hnathawh ṭhat avanga hlan tur an ni bawk.

Gallantry award hi chi hrang hrangah ṭhen a ni a, January 26, 1950 khan gallantry award hmasa ber pathum Param Vir Chakra, Maha Vir Chakra leh Vir Chakra te chu sorkar laipuiin siamin, January 4, 1952 khan Ashoka Chakra Class - I, Ashoka Chakra Class - II leh Ashoka Chakra Class - III te siam leh a ni. Hengte hi Ashoka Chakra, Kirti Chakra leh Shaurya Chakra tiin an thlak leh a ni. Gallantry award hi kum tin vawi hnih pek ṭhin a ni a, vawi khatna hi Republic Day-ah niin, a vawi hnihna hi Independence Day-ah pek a ni thung.