SC judge atan Justice Prasanna Bhalachandra Varale la lut

Justice Prasanna Bhalachandra Varale chu nimin khan Supreme Court judge atan rinawmna thu tiamtira lak luh a ni.

Supreme Court judge-ah hian Varale tel hian Dalit hnam pathum an awm ta a, a dang pahnihte chu Justice BR Gavai leh Justice CT Ravi Kumar te niin, Justice BR Gavai hi seniority aṭanga tehin Chief Justice of India ni leh tur a ni.

SC judge atana Justice Varale ruatna hi sorkar laipui chuan January 24 khan a pawm tawh a ni. Justice Varale rawt a nih hian collegium chuan thuchhuah siamin,"Judge-te hna tam sawtzia ngaihtuahin court hian engtik lai pawha kim ṭhapa hna kan thawh reng hi a ngai a ni. Supreme Court hi kim ṭhapa judge 34 awmin hna kan lo thawk kumkhua ṭhin a, hei vang hian 2023 chhung pawh khan case 52,191 kan chinfel theih phah a ni," tiin, Supreme Court-a judge awm thei zat chu an kim ṭhap reng a ṭul thu an tarlang a ni.

Justice Varale hi nikum December 25-a Justice Sanjay Kishan Kaul a chhuah tak avanga hnawhkhahna a ni a, Supreme Court judge atana ruat a nih hma hian Karnataka High Court Chief Justice a ni ṭhin a ni.